Du treng strengt tatt ikkje eit budsjett for huset, men du bør ha ein ide om kor høg kvadratmeterprisen vil vere, og ut frå det finne ut kor stort hus du har råd til. Skal du ha ekstra påkosta ting så må jo det bli tatt med i reknestykket også. Arkitekten er jo ikkje den som bestemmer prisane på husa, så sjølv om dei kjenner byggemarkedet til ein viss grad trur eg dei vil få problem om dei skal tegne til ein bestemt pris. Eg trur at det er ein sjølv som må ta det ansvaret, og sørge for at teikningane blir justert til eit prisnivå ein kan tåle.  Det vi har gjort er å sjekke opp på kvadratmeterprisar sjølv, og bedt henne lage ei planløysing som er "billig" å bygge.

Rekninga var det naturlig å splitte; meiner å hugse vi gjorde avtale om 6 betalingar. Ho har ikkje operert med timepris, men med "bolkar" av innbetalingar (typisk 30 000), som det kjem rekning på etter at ein "milepæl" er passert. Vi hadde ei innbetaling der vi framleis sto fritt til å bryte avtalen. Denne kom i forbindelse med dei første meir utførlige skissene. Ein kan bryte kontrakten seinare også, men då er det ein brøk som skal betalast av den avtalte sluttsummen.

Ho brukte ein standard kontrakt; vil tru alle seriøse i faget brukar dette.

Vi hadde ikkje skisser til henne under første møte. Ho ba om å få heilt blanke ark. Når det er sagt; ho hadde ein utførlig "intervjurunde" med oss heime i vår eiga stove. Vi la inn "bestilling" på antal rom, antal kvadratmeter, 2 etasjar, fordeling av areal på dei ulike romma (stort kjøkken, lita stove f.eks), alle soverom samla,  peisovn som var synlig frå både kjøkken og stove, god flyt og trafikk i huset, garage, store vindu mot sånn og sånn himmelretning etc etc etc. Ordflommen vår la heilt sikkert rammene for kva ho tegna, men ho hadde altså heilt frie hender.

Det var forferdelig spennande å vente på kva ho kom opp med! Vi er veldig fornøgde så langt. Lett og grei å samarbeide med; det er ein myte at alle arkitektar er sære og vanskelige Dei finst nok, men dette bør ein kunne "sense" på eit tidlig møte.